Pamilya sa giingong gidagit-patay nanawagan og hustisya

Davao City- Masulob-on ang pamilya sa gidangatan sa 23 anyos nga si Dennis Panzan, ang batan-ong alegasyong nakaikyas sa mga tawong ni-abduct kaniya apan nakabsan kini sa iyahang kinabuhi niadtong Lunes.

Sa interbyu sa DXDC RMN Davao sa mga ginikanan sa biktima, buot nilang maimbestigahan og sakto ang nahitabo sa ilahang anak.

Matud sa amahan, daghang bun-og sa kalawasan ug adunay giingong paso sa sigarilyo si Dennis dihang nakita na niini iyahang anak sa morgue.

Nagbangutan ang inahan sa biktima tungod naputol ang pangandoy sa iyahang anak nga maka-eskwela sa TESDA ug nanimpalad sa syudad sa Davao gikan sa ilahang probinsya sa Carmen, North Cotabato.

Matud sa kuya niini nga maoy gipuy-an sa biktima sa syudad, adunay mga nagpailang mga awtoridad nga nag-interrogate sa iyahang manghod niadtong Biyernes sa gabie sa ilahang meat shop sa Calinan.

Kato usab ang ulahing higayon nga nakita niya ang biktima ayha kini niya gi-report nga na-missing niadtong Sabado sa buntag sa Calinan Police Station.

Gibarugan sa pamilya nga inosente kini sa akusasyon nga suspek kini sa Vlanche Marie Bragas rape slay case.

Kahinumduman nga nagpatabang si Dennis sa mga residente sa Matina Aplaya human kini giingong nakaikyas sa mga ni-kidnap kaniya.

Nakabalot og packaging tape ang tibuok nawng ug nakaposas ang mga kamot niini dihang giendorso sa Talomo Police Station.

Apan dihang ginainterbyu kini sa istasyon sa kapulisan kalit kining na-collapse, naglisod ug ginhawa ug nag-seizure.

Gi-CPR pa sa station nurse ang biktima una kini gidala sa ospital.

Gikumpirma ni Police Major Noel Villahermosa, Chief of Police sa Talomo Police Station nga ang maong batan-on nabugtuan na sa iyahang kinabuhi sulod sa Adventist Hospital.

Nidumili na usab ang mga kabanay mga ipailawom sa awtopsiya ang biktima.

RadyoMaN Aimee Guinita

Facebook Comments