Koronadal City ——Hustisya ang singgit sa pamilya sa usa ka lalake nga napusilan sa usa ka pulis sa Purok Paraiso, Barangay Sinolon, T’boli, South Cotabato kaniadtong Oktubre 28.
Matud pa ni Merlina Pradilla asawa sa napusilan nga si Felix Pradilla nga nakabsan ug kinabuhi kaniadtong Nobyembre 6 tungod sa naangkon nga igo sa bala sa iyang tiyan nga dili makatarunganon ang gihimong pagpusil sa iyang bana.
Kahinumduman nga nga gikaingong nagmaoy ang igsuon sa napusilan nga si Barangay Kagawad Carlito Pradilla sa ilang piyesta hinungdan nga girespondihan sa pulis nga si PO1 Ramises Agar.
Unang gitaho nga gidapigan matud pa sa namatay ang iyang igsoon hinungdan kini napusilan sa pulis.
Apan, ang iyang asawa milimod niini. Si Merlina naglaum nga makab-ot ang hustisya alang sa iyang namatay nga bana human sa insidente. Desidio usab si Merlina nga pasaka-an ug kaso ang maong pulis. (Synymer Carisma Obena)
