Pamunuan sang City Health sang Koronadal indi pa kumpirmahon nga may local transmission na sang COVID-19 sa syudad.

18

Wala pa ginakumpirmar ni Dr. Edito Vego, OIC City Health Officer nga may “local transmission” na sang Covid-19 sa syudad sang Koronadal, apang wala niya ginakakas naman ang posibilidad.
Ini matapos nga nagpositibo ang isa ka seaman nga wala naman sang travel history sa mga lugar nga may kumpirmado nga kaso sang covid-19.
Sa ginpatigayon nga press conference kahapon nga adlaw, ginpahayag ni Dr. Vego nga ginahulat pa nila ang resulta sang ginapatigayon nga imbestigasyon nga mangin basehan sang ila nga kumpirmasyon kag deklarasyon kon may-yara na sang local transmission sang nasambit nga balatian sa syudad.
Samtang sa subong yara na suno pa sa isolation facility ang pasyente kag yara sa maayo nga kondisyon matapos nga asymptomatic naman suno pa ini.
Apang padayon nga ginaawhag ni Dr. Vego ang publiko nga pabakudon kag seryosuhon ang pagtuman sa mga health protocols kapareho sang social distancing, pagsuksok sang face mask, permanente nga paghugas sang kamot kag likawan ang mga matawo nga lugar.
Ginsiguro man ni Koronadal City Mayor Eliordo Ogena nga may-yara sang ginahimo nga tikang ang city health office agud malikawan ang paglapta sang virus kag ginaawhag man ang mga pumuluyo nga mangin kalmado sa pihak sang mga isyu nga may local transmission sang covid-19 sa syudad.
Kadungan sang pressconference kahapon nga adlaw nagpangayo man sang pasaylo ang pamunuan sang City Health Office sang Koronadal sa pasyenti kag pamilya sini sa paglapta sang impormasyon sa social media sa mga ginkadtuan sini nga mga establishemento nga kabahin sang ginapatigayon nila nga contact tracing.


Facebook Comments