Pangagamhanang siyudad sa Malaybalay, gipasabot ang papel sa siyudad mahitungod sa isyu sa tubig

OLYMPUS DIGITAL CAMERA
Gipasabot sa Pangagamhanang siyudad sa Malaybalay ang papel nga gihuptan niini mahitungod na sa isyu sa tubig.

Nasayran nga daghanang mga konsumante karon ang nagreklamo sa serbisyo sa prime water ug Malaybalay City Water District tungod sa kanihit ug usahay sa pagkawala sa supplay sa tubig mga mu-agas sa ilang mga gripo.

Sa interview sa RMN Malaybalay ngadto kang Malaybalay City Mayor Atty. Jay Warren Pabillaran, gibutyag niini nga isip mayor iyang gihimo ang tanan subay sa mandato nga gihatag niini.

Gipasabot niya nga dili ang siyudad ang kinatibuk-ang mupatuman sa water system tungod kay aduna may water district nga mudumala niini.

Apan matud niya ang mayor maoy mutudlo sa lima (5) ka mga board of directors sa water district matag unom (6) ka tuig.

Gibutyag pa ni Mayor Pabillaran nga unique ang kahimtang sa Malaybalay tungod kay ang siyudad ang nagproduce sa tubig ug gibaligya kini ngadto sa water district.

Una niini gipahigayon ang consultative meeting kauban si City Mayor Jay Warren R. Pabillaran ug sila si CEEDMO Designate Romeo R. Lapeciros, Jr. ug mga kawani sa Malaybalay City Government Water Supply System pinangulohan ni Mr. Tomas Y. Taga niadtong Biyernes.

Tumong sa maong panagtigom ang panglantaw nga mahatagan og kasulbaran ang mga nagkada-iyang suliran nga may kalabutan sa panubig sa syudad sa Malaybalay.

Nahilakip sa mga plano nga mahatagan og igong supply sa tubig ma-inom ang mga lumulopyo sa Malaybalay.

Napadangat usab sa maong tigum ang mga plano nga mapadako ug mapalambo ang ubang mga tinubdan sa tubig alang sa malungtaron nga supply ingon man dugang kinitaan sa syudad sa Malaybalay.

Matud ni Pabillaran nga limitado ang papel nga gihuptan sa siyudad tungod kay niadtong 2018 lang nisulod og joint venture ang MCWD ngadto sa Prime Water nga mao na karoy nagdumala sa distribution.

Facebook Comments