Ikinagulat ng Department of Social Welfare and Development-ARMM ang kumakalat sa social media na nakunan ng video ang isang barangay Kapitan na nangungulekta sa mga benepisyaryo ng Pantawid Pamilya Pilipino Program (4Ps).
Sinabi ni DSWD-ARMM Sec. Rahima Datumanong Alba matapos nilang mabatid ang problemang ito ay kaagad silang nagpadala ng team sa lalawigan ng Lanao del Sur, partikular sa Barangay Sigway kung saan nangyari ang pangongolekta.
Ayon pa kay Sec. Alba na pinaiimbestigahan na nila ang naturang pangyayari para maaksyunan.
Sa inisyal na report na ipinarating sa kanya, sinabi ng kalihim na napag-alaman ng team na ang naturang barangay official ay matagal nang nag-aabuso. Hindi umano ito ang unang pagkakataon na nagkaroon ng kahalintulad na pangyayari.
Kasabay nito, nagbabala naman si Sec. Alba sa iba pang opisyales ng barangay na kagaya ng barangay chairman ng barangay Sigway, na ihinto na ang kanilang illegal na gawain.
