Pari ginreklamo matapos pilit nga ginpaluhod ang lolo nga may arthritis, tiyo nga PWD sa isa ka misa

Dumaguete City – Magahimo sa tikang ang Diocese of Dumaguete para usisaon ang reklamo kontra kay Father Jose Abellar nga ginsiling nangin arogante sa isa ka misa sa lubong sa banwa sang Bacong, Negros Oriental.

Sa Facebook post ni Nikki Gonzales, iya ginsaysay kon paano ginpilit sang pari ang mga indi Katoliko kag persons with disabilities nga magluhod. Isa ka video ang nangin viral sang Sabado, Marso 4 angot sa amu nga insedente.

Suno kay Gonzales, makapila ka beses nga ginlawag sang pari sa mikropono nga indi siya mag-umpisa sang misa kon indi magpungko ang sa likod nga bahin sang simbahan. 

Rasun naman sang pamilya, indi makapungko ang ila lolo bangod ini ang may arthritis kag ang iya tiyo naman ang isa ka PWD bangod sa balatian nga diabetes.

Nagbais pa sa ila pari kag nagsiling, "ngaa nga gindala pa sa simbahan ang iya tiyo nga kumpol".

Bangod kay nainsulto, nagguwa nalang sila kag wala nagtambong sang misa sa diin pagkatapos, nagpalapit sila liwat sa pari sa pagpati nga magapangayo sang pasensya ang natungdan apang wala ini natabo. Nagrasun pa ang pari nga dapat sundon nila ang patakaran sang simbahan kag respituhon.

Wala na sila sang may mahimo bangod gina-insister gid sang pari nga siya ang insakto. Indi naman sila luyag nga padalman pa ang hitabo, ang ila lang nga indi na ini masulit sa masunod nga mga tinion. 

Sa ila ihibalo, si Abellar ang ginasiling ang may mga kaangay man nga kaso sa Siquijor rasun nga ini ang ginsaylo sa Negros Oriental. /dyHB-Bacolod



Facebook Comments