Pasinaway ug “Combat shoes” gilusad sa GSCPO

11

General Santos City–Pormal nang gilusad sa General Santos City Police Office ang programang “Shining Example” alas 9:00 ang takna sa buntag atol sa flag raising ceremony sa kapulisan niadtong Lunes.

Sumala pa ni Police Lieutenant Col. Jose Marie Simanagan ang company commander sa City Mobile Force Company (CMFC) sa GSCPO nga ang programang “Shining Example” mao ang pagmando sa kapulisan nga kanunay nga sinaw ang ilahang mga combat shoes nga gamit nila matag adlaw.


Pinaagi matud pa niini mapakita sa kapulisan kung unsa sila ka responsable sa ilahang trabaho sa simple nga pagpasinaw sa ilahang mga ginasuot nga sapatos.

Pasabot matud pa niini nga kung mabuhat nila ang kamanduan sa ilahang labaw mabuhat usab nila ang mga bug-at nga trabaho hilabi na ang pagbantay sa kahapsay ug kalinaw sa syudad sa Gensan.

Samtang sa matag karon ug unya magpahigayon ug inspeksyon si Col. Lagradante sa mga pulis aron masayran kung padayon ba nilang gina-ampingan ang ilahang mga gamit ug ang mosupak matud pa sa maong kamanduan ang mag-atubang ug silot.(Dave Silagan)

Facebook Comments