Pasko Fiesta 2019 gipangandaman

Davao City – Mahimong Santa’s Toy Factory ang Davao City Hall alang sa umaabot nga Pasko Fiesta 2019 diin kini opisyal nga pagaablihan karong Nobyembre 22, 2019, alas-5:30 sa hapon.

Atol sa gipahigayong iSpeak Forum, gibutyag ni Davao City Tourism Officer Generose Tecson nga 85% na nga andam ang Davao diin ginapaabot na lamang ang pagmontar sa dekorasyon gawas sa Davao City Hall.

Sumala ni Tecson, gigahinan og P22 million nga pondo ang Pasko Fiesta, mas taas og tunga sa milyon sa milabayng tuig.


Adunay 23 ka mga opisyal nga aktibidad ang gitanyag sa lokal nga panggamhanan diin pipila sa kinaham ang Pasko Fiesta 3D Wall Mapping, Sayaw sa Pasko, ug ang Yugyugan sa Pasko Fiesta nga ipahigayon sa Sta. Ana Wharf.

Dugang sa tourism officer nga ang Lamdag Parada lamang ang dunay kalahian diin inay mga four wheeled vehicles, pedicab nga dunay dekorasyon sa mga suga ang mupartisipar kung asa lehitimo ug duna dapat silay business permits.

Nakaplastada na sab ang mga aktibidad alang sa mga kabataan, mga membro sa lesbian, gay, bisexual and transgender community, indigenous peoples, senior citizen ug persons living with HIV.

RadyoMaN Jason Amisola

Facebook Comments