Pasyente gikan sa Davao Region nga nakalusot sa checkpoint, naka-isolate na sa COVID-Facility sa Sarangani

General Santos City—Naka-isolate na sa COVID-19 facility sa Sarangani Province ang usa ka personahe nga taga Alabel, Sarangani Province kansa una nang miabot sa maong lungsod gikan sa Bajada, Davao.

Ang maong pasyente, nakalusot sa mga checkpoints gikan sa davao Region ug malampusong nakauli sa ilang lugar sa Alabel.

Sa kasamtangan giatiman na ang nasangpit human nga nakitaan ug sintomas sa Covid-19 ug gihuwat pa ang laboratory test niini.


Sumala pa ni Alabel, Mayor Vic Paul Salarda nga pinaagi sa tabang sa mga barangay official sa Barangay Algeria, nasayran ang pag-abot sa maong pasyente .Gilayon nga naghimo ug aksyon ang lokal nga panggamhanan uban ang MHO-Alabel sa maong lungsod ug gi-isolate gilayon ang maong pasyente.

Mapasalamaton si Salarda sa mga opisyal sa Barangay Alegreia sa paspas nga pag-aksyon sa maong impormasyon tungod kay nasayod sila kung unsa ka pelegroso ang gihimo sa maong pasyente hilabi na nga gikan kini sa lugar nga adunay positibo sa COVID-19.

Tungod niini nanawagan si Mayor Salarda sa mga taga Alabel nga na-stranded sa ubang lugar nga makig-alayon kanila kung gusto na nilang mouli sa ilang lungsod.

Andam motabang ang panggamhanang lokal sa Alabel sa mga gustong mouli basta sundon lang ang proseso niini.

Alang sa mga stranded, mamahimo nilang bisitahon ang facebook page nga “Information Alabel” aron ilang masayran ang kinatibuk-ang detalye ug proseso sa pag-uli sa ilang lungsod.

Giklaro usab ni Mayor Salarda nga sa karon andam na sila, uban ang Provincial Government sa Sarangani Province sa pagpapauli sa mga Sarangan nga na-stranded sa ubang lugar pinaagi sa “Balik Probinsya” nga programa ni Senator Bong Go.
Sa lungsod sa Alabel, ang matag barangay matud pa may mga Isolation Area na nga gimuntar, pinaagi na usab sa tabang sa Deped Sarangani.

Plano usab karon sa LGU-Alabel nga mopalit ug van aron gamiton sa pagsundo sa mga taga Alabel nga stranded sa ubang lugar nga buot mobalik sa ilang lungsod.(CDS)

Facebook Comments