Payong-payong driver nga taga-Dinas gipusil sa lungsod sa Dimataling, motibo sa krimen gisuta sa kapulisan

Dinas,Zamboanga del Sur – Daling naglusad og hot pursuit operation ang kapulisan sa lungsod sa Diamtaling human sa nahibong pagpamusil 10:56 kagahapong adlawa sa Purok 13, Brgy. Poblacion, Dimataling, Zamboanga del Sur.
Giila sa Dimataling Police ang biktima nga si Eduardo Asoy Jr., 41 -anyos, driver ug residente sa Proper Dimaya, Dinas niining probinsya.
Sa inisyal nga imbestigasyon nasayran nga samtang gimaneho sa biktima ang payong-payong gikan sa Barangay Poblacion, Dimataling paingon sa iyang pinuy-anan apan paghidangat sa Sitio Codilog, Barangay Poblacion, Dimataling kalit nga gipusil sa nagpa-atang nga mga suspek gamit ang calibre 45 nga pistola.
Igo pinusilan sa ulo ang hinungdan sa hinanali nga kamatayon sa biktima samtang dali usab nga nisibat ang mga suspek paingon sa wala matino nga direksyon.
Nakuha sa dapit nahitabuan ang duha ka basiyo sa bala ug laing buhing bala sa calibre 45 nga pistola.
Naglusad na sa makuting imbestigasyon ang kapulisan alang sa pagsuta sa identipikasyon sa mga suspek ug masayran ang motibo sa maong pagpamusil.

Facebook Comments