Davao City – Nanarangka ug gibiyaan sa giingong mga dili lisensyadong mga dentista ang usa ka pasyente sa usa ka dental clinic atol sa Joint inspection sa pagpanguna sa Philippine Dental Association Davao City Dental Chapter uban ang Department of Health, Davao City Anti-Scam Unit ug DCPO Investigation and Detective Management.
Sa interbyu sa DXDC RMN Davao kang PDA Mindanao ug DCDC President Dr. Carlos Capitan II nga mamahimong manubag ang lisensyadong dentista kinsa tag-iya sa maong dental clinic.
“Aduna miy naaktuhan nga klinika nga wala ang doktor didto pero nagaempleyo siya og usa ka walay lisensya nga dentista. We will call her before the Committee on Ethics sa Philippine Dental Association Davao City Dental Chapter ug paningkamutan namo nga matanggalan ni namo’g lisensya,” sumala ni Capitan.
Samtang sumala sa nahibiling pasyente nga iyang namatikdan nga dili na maayo ang nilihukan sa mga nibiya nga giingong mga dentista nga nag-cleaning sa iyang ngipon.
“Ang ilang giingon sa ako nga mag-cr daw ko, ako daw ang mag-cr, nganong mag-cr man daw ko? Something’s wrong makita nako. Duha sila, nihawa sila dili ko sure asa padulong,” matud sa maong pasyente.
Gisulayan pa usab og kuha sa DXDC RMN Davao ang side sa dentistang tag-iya sa maong klinika kalabot sa insidente.
Matud ni Dra. Rochelle Salinas nga tumong niining ilang kampanya aron mapakgang kining mga dili lehitimong mga dentista ug masusi ang mga kagamitan sa mga klinika ug kung adunay kiniy ensaktong sterilizer partikular na auto clave para sa mga instrumento sa ngipon.
Delikado alang sa mga pasyente kung hugaw o wala nalimpyuhan ang mga kagamitan ug mamahimo kining mataptan og mga delikadong sakit sama sa HIV, Hepatitis, Tuberculosis ug daghan pa.
Nagpadayon ang Davao City Dental Chapter sa pagpamilit sa mga stickers sa mga klinika silbing timailhan sa mga pasyente nga lehitimo ang maong dental clinic ug ila na gayod kining na-check.
“Iyong stickers na iyon will show ang itsura talaga ng dentista nandoon so they can check kung naga-work sa loob at saka sa picture is the same nandoon ang pangalan atsaka licensed number, dapat ding mga associates mayroon ding stickers,” segun ni Salinas.
Unom ka mga dental clinics sa syudad ang gipangsusi atol sa joint-inspection sa nagkadaiyang ahensya.
Sumala sa PDA mamahimong mag atubang og kasong may kalapasan sa RA 9484 o Dental Law ang mga ga-practice og illegal dentistry.
Base sa record sa DCDC mokabat na sa 12 ka mga indibidwal ang nakasuhan sukad niadtong 2016.
RadyoMaN Aimee Guinita
