Subling nagpahimangno karon ang Provincial Disaster Risk Reduction and Management Office kon PDRRMO sa probinsya sa Sarangani nga magbinantayon og maging alisto ning panahon sa ting-ulan.
Segun ni Mr. Rene Punzalan, ang provincial disaster risk reduction and management officer, opisyal na matud pang gi-deklara sa PAG-ASA ang panahon sa ting-ulan. Niaging adlaw, na-upgrade na sa technician sa PAG-ASA ang local weather monitoring system nga naa gibutang sulod sa Kapitolyo sa Sarangani. Ang maong himan ang maoy musuta matag adlaw sa weather condition og weather forecast sa tibuok Sarangani Province kung diin ang datus ang makuha gamit ang internet.
Bantayanan ang localized thunderstorm nga maoy hinungdan sa mga nasinatiang pag-ulan ulan. Nagpalayo naman matud pa ang low pressure area sa Luzon apan padayon gihapon nga makatagamtam og mga pag-ulan tungod gihatak niini ang Hanging Habagat. Kagabii, may nakita napud nga laing low pressure area duol dinhi sa isla sa Mindanao, hinuon wala pa kini kasulod sa Philippine Area of Responsibility.
Samtang, gi-preparahan na sa Sarangani Province ang selebrasyon sa National Disaster Resilience Month sunod bulan sa Hulyo ilalum sa Sulong Kaligtasan program ni Governor Steve Chiongbian Solon. Mu-focus ang mga aktibidad sa barangay og family-oriented disaster preparedness masiguro nga sa panimalay og barangay pa lang, preparado na ang mga indibidwal. Mahimong highlight usab ang Provincial Gawad KALASAG Awards paghatag pasidungog sa mga LGU og organisasyon nga padayong gapalig-on sa ilang programa nga pagpangandam sa kalamidad og katalagman.
