PDRRMO SARANGANI SUBLING NAGPAHIMANGNO SA MGA ANGAY BUHATON KUNG ADUNAY MASINATIAN NGA PAGLINOG

Subling nagpahimangno ang PDRRMO kon Provincial Disaster Risk Reduction and Management Office sa probinsya sa Sarangani nga magpabiling makalmahon kung adunay masinatian nga mga paglinog.

Mao kini ang nahimong reaksyon ni Robert Lubonting, ang operations officer sa PDRRMO Sarangani, human nakita nga nagdiganay ang mga tao sulod sa usa ka mall atol sa nahitabong pagtay-og Martes sa gabii, 5.4 magnitude nga ni-sentro didto sa Makilala, North Cotabato.

Dili matud pa kalimtan ang mga gitudlo sa matag quarter nga pagpahigayon og earthquake drill, og kana mao ang technique gitawag nga ā€œDuck, Cover and Hold.ā€ Kalmado og dili mudagan aron dili na hinuon ma-disgrasya. Gikinahanglan lang ang ā€œpresence of mindā€ samtang ginagunitan ang ulo. Mangitag luwas nga lugar nga pulidong maka-cover sa ulo og lawas samtang nagpadayon ang paglinog. Ayha na mugawas kung stable na ang palibot. Bantayan lang usab ang mga aftershocks.


Sa pag-monitor sa PDRRMO Sarangani minutos human sa maong paglihok sa yuta, walay natalang damyos sa mga vital installation sa pito (7) ka lungsod sa Sarangani Province. Baynte-kwatro (24) oras matag adlaw ga-monitor ang emergency operations center sa probinsya og sa mga munisipyo, og tuod man nagamit nila ang earthquake intensity scale nga anaa gibutang sa Philvolcs sulod sa Kapitolyo sa Sarangani maoy nisukod sa gikusgon sa linog nga naka-apekto sa Sarangani.

Wala pay himan nga naimbento aron mutagna sa pag-igo sa linog maong gikinahanglan kining pangandaman tungod kay kung mupasulabi ang pag-panic sa huna-huna, malimtan na ang mga ginabuhat sa matag quarter nga tsunami og earthquake drill.

Gipaniguro na lamang ni PDRRMO Sarangani Operations Chief Lubonting nga sa pagpanguna sa ilang Provincial Disaster Risk Reduction and Management Officer Mr. Rene Punzalan, magpadayon ang ilang community-based disaster training sa mga kabarangayan kauban ang mga counterpart sa munisipyo og barangay sa MDRRMO og BDRRMO, hilabi na nga karong bulana pud gisaulog ang Nation-wide Disaster Resilience Month.

Mas nakatutok karon matud pa ang ilang pagbansay ngadto sa mga pamilya og sa mga myembro sa panimalay nga maoy unang musalbar sa ilang mga kabanay. Sila na usab ang mutudlo sa ilang mga silingan. Alayon kini sa kamanduan ni Governor Steve Chiongbian Solon nga ā€œtighten convergence, increase momentum, strengthen the family towards a God-centered prosperous Sarangani.ā€ Pagpahugot sa pagkatakdo, pagpakusog sa hunat, og pagpalig-on sa pamilya padulong sa malambuong Sarangani nga naka-sentro sa kabubut-on sa Ginoo, sa pagsuporta nila Senador Manny og Congressman Ruel Pacquiao, Vice Governor Elmer De Peralta, mga board member og mga mayores.

Samtang, nagpadayon ang pahimangno sa PDRRMO og MDRRMO sa mga taga-Sarangani Province nga padayon maging alerto ning panahon sa ting-ulan nga mulungtad hangtud pa sunod mga bulan, hilabi na ang mga nanimuyo sa mga danger zone. Padayon lang ang pagmuntar sa PDRRMO Sarangani sa mga steel signages sa mga barangay gahatag pahimangno sa mga flooding og landslide prone area.

Facebook Comments