Peacetalks resumption gisupak

19

Davao City – Gibati og kabalaka ang usa ka tribal leader niining dakung kahigayunan sa pagbalik sa hinabing pangkalinaw tali sa gobyerno sa Pilipinas ug sa CPP-NPA-NDFP.

Katarongan sa tribal leader nga si Datu Allan Sundihan nga gamiton lang sa rebeldeng hut-ong ang peacetalks aron subling pakusgan ang ilang puwersa gikan sa paingon na unta nga pagkapukan.

Gibarugan ni Sundihan nga walay sinseridad ang CPP-NPA-NDFP sa peacetalkas busa kawang lang gihapon kun ibalik kini sanglit ang ilang motibo mao man ang pagpildi sa demokrasya aron mahulipan og kumunismo ang nasud.

Gumikan sa liboan ka mga rebeldeng mitahan balik sa gobyerno natay-og ang Central Committee sa CPP-NPA-NDFP niini nga kun dili sila muhimo og hinanaling pamaagi hayan mahurot ang ilang mga sakop og ka-surender og hingpit mabungkag ang ilang grupo.

Kamatooran niini, giingon ni Sundihan nga dagsa ang mga lumad sa kabukiran mibalik sa gobyerno ug hingpit gibiyaan ang dunot nga kalihukan nga mihimo kanila og kriminal ug miguba sa ilang pamilya ug kaugmaon sa kinabuhi.

Busa daku ang pagduda sa tribal leader nga gipamugos sa mga rebelde ang peacetalks kay mao lang kini ang bugtong pamaagi aron mapugngan ang dugang pagtahan sa ilang mga ginsakpan.

Nahibaloan nga daghan sa mga lumad ang nakumbinsir musampa sa kalihukan tungod kay gigamit nga puhuan sa mga rebelde ang pangalan ni Presidente Rodrigo Duterte.

Gipatuo matud pa sa maong pundok nga ang mga lumad sa kabukiran nga si Pangulong Duterte kaabin sa pakigbisog sa pagtumpag sa demokrasyang panggobyerno sa nasud.

Busa dili na angay magkumpromiso ang gobyerno sa paghisgot sa kalinaw uban sa mga kumunista kay igo lang kini pahimuslan aron makaagni na pod og mga lumad sa kabukiran.

Sa personal nga barugan ni Sundihan, dako kining supak nga subling buhion ang peacetalk tali sa gobyerno ug CPP-NPA-NDF sa katarungan nga bisan kanus-a traydor gayod kining grupoha.

Busa suportado sa tribal leader ang pagsupak ni Mayor Inday Sara Duterte-Carpio nga mahatagan og laing agianan ang GRP ug teroristang CPP-NPA-NDF aron magtakdo ang ilang mga tunob sa peacetalk.

RadyoMaN Joel Viray

Facebook Comments