Peacetalks revival gidasonan

Davao City – Suportado sa 10th Infantry Division (ID) Philippine Army ang laraw ni Pres. Rodrigo Duterte nga iyang subling ablihan ang pultahan sa hinabing pangkalinaw tali sa CPP-NPA-NDFP human kini natak-opan pila na ka bulan ang nakalabay nunot sa mga kalapasan nga gihimo sa mga kumonista sa peacetalk.

Sumala ni 10th ID Spokesperson Capt. Jerry Lamosao nga isip ilang Commander-in-Chief, ang pangulo dapat lang ilang tahuron sa bisan unsang makab-ot niini nga desisyon sama sa pag-abli pag-usab sa peacetalk ngadto sa rebel group kay kaayohan man kini sa katawhan ug sa Pilipinas.

Nagtoo si Lamosao nga dili maapekuhan ang kredibilidad sa pamuno-nasud niining iyang pa usab-usab nga timpla diha sa pag-engganyo sa mga komunista paingon sa lamesa sa peacetalk luyo sa iyang kamandoan nga pulpugon ang mga terorista nga nahimong dangan sa kalinaw ug kalamboan sa tibuok nasud.


Naa na karon sa mga rebelde ang bola kung ila bang dawaton ang ilatag nga mga kahigayunan sa gobyerno aron sugdan ang subling pag-arangkada sa peacetalk tali sa GRP ug NDFP, segun ni Lamosao.

Ugaling sanungon sa rebel front ang tanyag ni Duterte, dakung hagit kanila ang pagpakita sa ilang sinseridad nga susi unya sa hingpit nga pagselyo sa mga kasabutan nga maoy dalan sa paghuman sa ilang pakigbisog ug pagkab-ot sa kalinaw ug kalamboan sa nasud, dugang ni Lamosao.

RadyoMaN Joel Viray

Facebook Comments