Arestado ang isa ka lalaki nga nagapakilala nga katapo sang counter-intelligence sang NBI nga nakabase sa siyudad sang Passi.
Sa gahum sang search warrant, gin-sulod sang National Bureau Of Investigation ang balay sang suspek nga si Ronald Barnizo, 32, anyos sang barangay Man-it , Passi City.
Sa nasambit nga search operation, nadakop sang mga katapo sang NBI ang suspek nga si Barnizo kag narecover sa iya balay nagkalain-lain nga mga armas luthang.
Ginpahayag ni Agent Jhon Katipunan nga nakabaton sila sang reklamo batuk kay Barnizo nga nagapakilala ini nga NBI kag nagademand sang kuwarta sa mga tawo nga nagapangayo sang bulig sa iya.
Bangud sini, gin-surveillance sang NBI ang hulag ni Barnizo kag natukiban nga naga-post pa ini sa facebook sang mga highpowered firearms kag pictures nga nagapakita nga miyembro ini sang NBI.
Nag-apply sang search warrant sa korte ang NBI sa kaso nga usurpation of authority kag illegal possession of firearms batuk kay Barnizo kag ila ini ginserbe sini nga gab-i.
Priso na ang suspek kag magapangatubang sang madamo nga mga kaso.
