Ta hace ahora el embuscada el maga pulis con un 40-año de edad persona quien alegaomente ya mata y ya entera pa consu live-in-partner in Sitio Cabigan, Maasin del mes pasao de quien cuerpo ya descubri del Webes serca man medio dia.
El pulis ta considera como suspechao si Edison Macansantos y Maatubang, por el brutal matansa consu mujer si Rizza Mae Toribio, 22, despues este ya escapa el dia ya encontra con el cuerpo del victima enterao na un sapa na Sitio Cabigan, Maasin.
Asegun con Sr. Insp. Daniel Taub, el jefe del Sinunuc Police Station ya tene que conduci sila el hot pursuit operation encontra con Macansantos despues lang ya puede recobri con el cadaver del victima pero ya esta este perdido y reportaomente armao pa le improvised shotgun cuando ya escapa este.
El pulis t acre ya mata si Macansantos con Toribio pormedio de tahyar na tangcugu usando sanggut y despues ya entera na su lote.
Del Enero 29 pa asegun banda ala una del madroga cuando si Toribio ya puede pa llama consu nana y ta pidi aucillo hablando que gende mas le agaunta con el pasipala que ta hace conele si Macansantos.
El nana di Toribio ya precura pa llama otravez banda alas 4 del aga pero nupuede mas man contac con el numero del cell phone di Macansantos que amo pa ya usa primero si Toribio para llama consu nana.
Banda alas 9 ya del aga cuando el nana di Toribio junto consu Segundo marido ya llega na casa di Macansantos para saca ya era consu anac pero ya habla el suspechao que ya juwi ya dao el victima y nohay mas na casa diila.
Porcausa con este ya bolbe ya lang el nana y fadrasto Toribio y despues el mas de un semana ya reporta sila el incidente na estacion del Sinunuc.
Dayun ya conduci follow-up operation el maga pulis pero nohay siempre encontra con Toribio hasta del Febrero 13, ya tene pa que imbita na estacion con Macansantos y consu subrino si until Cris un menor de edad quien asegun pirmi junto canila na casa.
Pero asegun ta precura manda cre si Macansantos que ya juwi lang si Toribio y nohay cosa ya pasa.
Por ultimo del Webes serca man medio dia ya conduci otravez follow-up operation el maga pulis junto con el maga pamilya di Toribio y maga official del barrio hast ya encontra estos con el cadaver di Toribio enterao na sapa bajo na propiedad di Macansantos.
Aqui tambien ya sale desaparasao si Macansantos donde ya escapa este para evita el aresto.
El pulis ay planta el caso de murder con Macansanto y possible hasta con Cris.
