General Santos City–Duna nay gihuptang testigo ang Police Station 4 kabahin na sa pagpamusil patay sa gwardya nga si Jonifer Mercado nga taga Barangay Baluan, Gensan kansa gipusil patay sa wala pa mailhing suspek atubangan sa gitrabahuan niining pharmacy sa Aparente Street, Barangay City Heights, Gensan pasado alas 11:00 sa gabie, niadtong Domingo, Nobyembre 25, 2018.
Sumala ni PO1 Rogelio Caparoso Jr. , imbistigador sa Police Station 4 nga subay sa pahayag sa testigo samtang nag cordon ang biktima sa gitrabahuan niini human silang nanarado, kalit matud pa kining giduol sa suspek nga nakamotorsiklo dayon gipusil.
Nakaangkon ang biktima ug igo sa iyang ulo nga maoy hinungdan sa iyang kamatayon. Personal grudge ang usa sa mga anggulong gitutukan karon sa kapulisan sa pagpamusil patay sa biktima.
Sumala ni PO1 Caparoso nga posibling pagpanimalos ang hinungdan sa pagpatay gumikan ang biktimang gwardya, usa matud pa sa nakasikop sa usa ka suspetsadong nangilog ug pusil ilawom sa area of responsibility sa Police Station 4 pila ka simana na ang nakalabay.
Dugang pa ni Caparoso nga gawas niini wala na may laing didudahan ang pamilya nga posibling motibo sa krimen.
