ILOILO CITY – Ginpauntat ni Mayor Jose Espinosa III ang Intelligent Transport System project ni anay mayor Jed Patrick Mabilog.
Ang ITS amo ang pet project ni Mabilog nga ginalauman makapahagan-hagan sang problema sang trapiko sa diversion road.
Suno kay Espinosa ginmando niya ang cancellation sang procurement bangud may nakita sya nga problema.
Ginpahayag sang alkalde nga luyag niya matun-an kun bala makabulig gidman sa pagsolbar sang problema sa trapiko ang proyekto.
Nahibaluan nga natapos na ang bidding sang proyekto kag ang KIV ang nagdaug nga supplier sang mga equipment nga ginalakipan sang computers, CCTV cameras, speed guns, command center equipment kag program sang system.
Luyag ni Espinosa nga may feasibility study anay antes ipatuman ang proyekto.
