Koronadal City – Patay ang usa ka Buntis ug angol ang bana ug 2 ka anak human mabangaan sa Mitsubishi Strada Pick up ang tricycle nga ilahang gisakyan sa National Highway sa dakbayan sa Koronadal niadtong nakalbayang adlaw.
Giila ang buntis nga si Suzette Panes, 38 anyos, lumulupyo sa Barangay Mabuhay dakbayan sa General Santos.
Matud pa sa traffic Investigation Section sa Koronadal PNP, kaangkon ug grabeng samad ang Mabdos nga si Suzette Panes sa dihang nabangaan ang tricycle nga ilahang gisakyan nga hinungdan sa iyang hinanaling kamatayon.
Angol sab ang bana niini nga si Randolf Panes nga maoy nagmaneho sa tricycle ug duha ka mga anak nga si John Rudolf Panes, 8 anyos ug John Patrick Panes, 12 anyos nga padayong giobserbahan ang kondisyon ug nagpaalim sa ilahang mga samad.
Nasayran nga nabanggaan sa Mitsubishi Strada Pick up nga gimaneho ni Almenzor Dotoya ang tricycle ug tungod sa kakusog sa pagpadagan sa pick up, nabangaan ang gisakyan sa mga biktima nga miresulta sa pagkaguba sa likod sa tricycle ug paglagpot sa driver ug uban pang sakay niini.
Misurender usab sa kustudiya sa kapulisan ang driver sa pick up. (Pj Sabalosa)
