Manila, Philippines – Pinangangambahang magtaas ang presyo ng mga pangunahing bilihin kasunod na rin desisyong ituloy ang dagdag na fuel excise tax sa 2019.
Ayon kay Philippine Amalgamated Supermarkets Association President Steven Cua – ginagamitan ng transportasyon ang mga pangunahing bilihin gaya ng mga karne, gulay at prutas kapag idini-deliver ito sa mga palengke.
Dagdag gastos pa aniya rito ang mga incidental expenses tulad ng christmas rush, traffic at pahirapan sa pagpa-park.
Dahil dito, hinamon ni cua ang pamahalaan na ipakitang ginagamit ang buwis sa pagpapagawa ng mga imprastraktura.
Para naman kay United Filipino Consumers and Commuters President RJ Javellana – dagok sa mga konsyumer ang ikalawang bugso ng excise tax lalo’t hindi pa sila nakakabangon sa mga nagdaang taas-presyo.
Nanawagan pa si Javellana sa Pangulong Duterte na palitan ang kanyang mga economic manager.
