PINAY SA RIYADH 10 KATUIG NGA GINTAGO SANG AMO, PAMILYA NAGAPANAWAGAN SANG BULIG NGA SIYA MARESCUE

657

Report ni: Tita Jen Palomo Debaja

Nadiskubre ang makaluluoy nga sitwasyon ni Moherma Dail, 30 anyos, dalaga kag tumandok sang Tayungan, Jolo, Sulu matapos nag hire sang isa ka Filipina ang utod sang amo sini sa Riyadh Saudi Arabia.

Suno kay alyas Jie nga amo ang nangayo sang bulig sa social media, nasaksihan mismo sini ang tratasyon sang kauturan nga lalaki sang ila amo kay Moherma. Gina himo ini siya kargador sang tanan nga gina pamakal pareho sang sinako nga bugas, mineral water, linata nga mantika kag madamo pa pasaka sa 3rd floor kon sa diin didto ang ila kusina.

Luwas nga ginasakit kag wala ginaswelduhan, 10 na ini ka tuig nga illegal sa Saudi. Wala na gin renew ang passport ni Moherma. Ginabawalan maggamit sang cellphone kag indi man pwede mag kontak sa iya pamilya sa Pilipinas. Ginapasalig man sang amo nga sa bangko lang ang iya sweldo kag ihatag nalang sa iya kon magpauli na.

Ginabawalan man si Jie makig estorya kay Moherma apisar updanay sila sa isa lang ka kusina. Ang paathag sang amo nga lalaki sa iya, nagbuang si Moherma kag labay labay ang ginawakal sini.

Likum sa ihibalo sang ila mga amo ginasulat ni Moherma sa papel ang mga impormasyon nga gusto ipahibalo kay Jie . Gina kumos niya ini kag ginahaboy para puluton ni Jie .

Nagapakitluoy naman ang utod sini nga si Jesmir Dail nga i-rescue na ang iya magulang tungod nagakabalaka nagid ang ila pamilya.Suno kay Jesmir, sa 10 ka tuig nga nadula sa ila ang iya utod daku na nga blessing ang mabalitaan buhi ini kag naga pangamuyo gid sila nga marescue ini kag makapauli na.

Sa karon naforward na naton ang request for rescue sa nasambit nga pinay kay sir Elmer Cato sang DFA kag gin advisan man naton ang pamilya nga mag coordinate mismo sa OWWA sa ila lugar .

Facebook Comments