Pintor nadakpan sa pagpayuhot sa illegal nga droga

Nadakpan sa pagserbisyo sa search warrant sa kapulisan ang usa ka pintor kabahin sa pagpayuhot sa illegal nga droga pasado alas 10:43 sa buntag kagahapon didto sa Purok 10, Gawad Kalinga, Barangay Casisang, Malaybalay City, Bukidnon.

Giila ang nadakpan nga si Jhon Robert Eluna, 23 anyos, ulitawo, pintor, ug residente sa naasoy nga lugar.

Gipahigayon ang pag-implementar sa search and seizure warrant sa kapulisan sa Malaybalay nga gi-issue ni Hon. Mirabeaus A. Undalok, Assisting Judge sa Regional Trial Court (RTC), 10th Judicial Region, Branch 8, Malaybalay City, Bukidnon, pinitsahan Mayo 6, 2022 alang sa paglapas sa RA 9165 kon Comprehensive Drugs Act of 2002.

Nakompiska atol sa operasyon ang unom ka mga heat sealed transparent plastic sachet sa drogang shabu nga gibana-banang mitimbang og siyete gramos ug mukantidad og P47,600.00.

Narekober usab ang usa ka walay sulod nga kaha sa sigarilyo, usa ka improvised plastic case, ug usa ka improvised bamboo sealer.

Gidala na sa Malaybalay City Police Station ang nadakpan nga suspetsado lakip ang mga nakompiskang ebidensya nga layong iturn-over sa PNP Forensic Unit alang sa eksiminasyon.

Samtang mag-atubang sa paglapas sa Article II, Sections 11 ug 12 sa R.A. 9165 kon Comprehensive Dangerous Drugs Act of 2002 ang dinakpang suspetsado.

Facebook Comments