Pipila ka lugar sa Davao Region apektado sa kusog nga ulan

14

Davao City – Pipila ka mga insidente sa lain-laing lugar sa Davao Region ang natala resulta sa kusog nga pag-ulan kagahapon adlawa (Mayo 7, 2021).

Sa interbyu sa DXDC RMN Davao kang Alfredo Baluran, City Disaster Risk Reduction Management Office (CDRRMO) head, gibutyag niini nga miabot sa code red ang Talomo river rason sa pag-evacuate sa mga residente nga nanimuyo daplin sa kasapaan.


“Nag abot ta’g code red especially ‘ning Talomo river kay tungod ang Talomo river kay sa ubos siya nga dapit. Diri man gud na mag abot ang tubig gikan sa taas. Unya sugat pa gyud sa tubig sa dagat. So, musaka gyud siya diri sa ubos nga dapit,” segun ni Baluran.

Sa Tugbok District, usa ka balay ang gibanlas sa tubig baha samtang laing duha pa ka balay ang naguba partikular na sa Barangay Balengaeng, Davao City kagahapon sa hapon.

Apektado usab sa pagbaha ang mga residente sa Bangkal, Toril ug uban pang bahin sa syudad sa Davao.

Samtang, sa Barangay Kasuga, Magsaysay, Davao del Sur, usa ka balay ang naguba human kini natumbahan og punoan sa lubi tungod sa kusog nga hangin ug pag-ulan.



Sa Davao Occidental, gatusan usab ka punoan sa saging ang gilampornas partikular na sa Brgy. San Isidro, Sta. Maria tungod sa hangin ug ulan nga nasintian.


Padayong pahimangno sa CDRRMO nga kanunayng mag-igmat labi na sa mga pag-ulan nga masinatian nga moresulta sa pag-overflow sa mga kasapaan.

RadyoMaN Kirby Manzon

Facebook Comments