Pipila ka opisyal sa gobyerno sa SOCKSARGEN-dili supak sa pagbutang sa kontrobersyal nga si Supt. Marcos sa CIDG-12

General Santos City– Walay isyu alang kang Gensan City Mayor Ronel Rivera ang pagpahimutang kang Police Supt Marvin Marcos isip labaw sa CIDG Region 12.

Sumala pa ni Rivera nga sa karon wala pa nakadawat ang iyang buhatan ug sulat bahin sa pagbutang kang Marcos sa maong pwesto. Apan matud niini nga kung kini man gyud ang mando wala syay kwestyon gawas lang sa hisgutanang moral ascendency sa pagdala sa iyang mga tawo tungod sa pagkalambigit sa pangalan ni Marcos sa kontrobersiya.

Dugang pamahayag ni Mayor Rivera nga luyo sa mga pagsaway angayan man usab nga hatagan ug tsansa si Supt Marcos nga mapakita ang iyang katakus ug kamatinud-anon sa pagdumala isip opisyal sa CIDG sa rehiyon 12. Kini gumikan wala pa man gyuy katin-awan gikan sa desisyon sa korte kung sad-an ba gyud si Marcos o dili sa mga akusasyon batok kaniya.


Samtang sa kabahin si Sarangani Province Governor Steve Chongbian Solon, wala syay nakit-ang problema sa pagpahimutang kang Supt Marvin Marcos sa CIDG 12 ug gani welcome kini kaayo alang kaniya. Kini tungod usab kay ang isyu ni Supt Marcos wala pa may pinal nga desisyon sa Korte.

Matud ni Gov. Solon nga lisud man usab nga hukman ang usa ka opisyal ug dili na palingkuron sa usa ka posisyon tungod lang sa isyu nga wala pay desisyon.

Kalabot niini nagtuo usab si Sarangani Gov. Steve Solon nga kung duna may dili maayong background si Supt Marcos, dili niya kini basta-bastang mahimo dinhi sa Rehiyon 12.

Kini gumikan nakatutuok na ang mata sa publiko kaniya tungod sa kontrobersyal niining pangalan nga nalambigit sa kamatayon ni Albuera Mayor Espinosa.

Nagatan-aw man usab ang administrasyong Duterte sa mga mamahimong lihok ni Marcos hinungdan nga lisud alang kaniya ang paghimo ug iligal.

Samtang alang kang Tupi Mayor Reynaldo Tamayo walay problema kaniya ang appointment ni Supt Marvin Marcos sa CIDG 12.

Matud ni Tamayo nga nakadepende man kini sa Depertamento sa CIDG ug sa ilang mga labaw. Apan lamang kung siya na ang magdumala sa rehiyon angayang siguruhon ni Marcos nga maayo ang iyang pagdumala sa Rehiyon 12. (Jordan Britos)

Facebook Comments