Pira nga grupo han yolanda survivors, gintawag nga "inutil" hi Presidente Duterte

TACLOBAN CITY – Gintawag han pira nga grupo han yolanda survivors hi Presidente Rodrigo Duterte nga inutil, tungod nga waray daw la gihap klaro an disaster agenda han gobyerno matapos an paglasurbo Han Super Typhoon Yolanda.

Pero sumala han Malacanang, doble-doble na iton aksyon han presente nga administrasyon para ma-address an rehabilitasyon han mga apektado han bagyo.

Sumala naman kan Efleda Bautista, Presidente han People Surge, hilaba na nga panahon an lima katuig para han rehabilitasyon ngan recovery para ha rehiyon.


Dugang ha iya pamahayag, mahinay ngan diri makatawo an rehabilitasyon ha ilarom han administrasyon ni Duterte. Sumubad daw hi Duterte han anay presidente benigno aquino iii.

Dida han huwebes, nagkamayada protest rally an pira nga yolanda survivors ngan ira ginsiring an ira mga gin-aaraba.

Padayon la gihap nga diri kompleto an housing project han gobyerno ngan sumala kan bautista, kulang iton livelihood programs han administrasyon.

Pero sumala kan Special Assistant To The President (SAP) Christopher “Bong” Go, malaksi nga nakarekober han Tacloban City ngan probinsya han Leyte.

Dugang ha pamahayag ni Go, 80 porsyento na nga kompleto an mga pabalay ha northern barangay han Tacloban.

Pagduon pa ni Go, padayon an pagtrabaho han 27.3-kilometer tide embankment project para protektaran an 30,800 nga balay ngan infrastructure ha Tacloban-Palo-Tanauan.

Samtang, basi ha datos han National Housing Authority (NHA), 205,128 an target nga housing nga matapos ngan as of October 30, 2018, 100,709 an nakompleto, 46,412 an mayada na nangungukoy, samtang, 54,297 naman an andam na ukyan.

Facebook Comments