PLDT gipatawag sa SP-Bukidnon aron hisgutan ang problema sa pagkawala sa internet

51

Gipatawag sa mga membro sa Sangguniang Panlalawigan ang mga kadagkuan sa Philippine Long Distance Telephone o PLDT aron hisgutan ang nahimong problema niini sa pagkawala sa internet sa tibouk Probinsya sa Bukidnon niadtong milabay nga mga semana.

Matud pa sa PLDT nga girepresentahan ni Engr. Rodelio S. Closas- Mindanao Field Office-PLDT Cagayan de Oro City nga usa sa hinungdan sa pagkawala sa linya sa internet lakip na ang linya sa ilang sister company nga Smart Telecommunications sa halos tibouk Probinsya sa Bukidnon mao ang pagkaputol sa ilang linya gumikan kay naigo sa construction sa drilling equipment sa Converge Telecom provider nga nakabase sa kauluhan.


Ang Converge Telecom provider usa ka kompanya sa telecommunication nga nakabase sa Manila nga naka-focus sa data transmission. Ang maong kompanya adunay ginabuhat nga proyekto sa linya gikan sa dakbayan sa Cagayan de Oro paingon sa dakbayan sa Malaybalay ug naigo ang linya niini sa Impasug-ong nga bahin.

Gipaningkamutan sa mga personahi sa PLDT nga dritsong mabalik ang maong linya apan mikabat ngadto sa 3 ka adlaw ang ilang pagtrabaho aron kini maayo. Nagpasaka na usab sila ug reklamo batok sa Converge Telecom provider ug damyos nga 30 milyones ka pesos kapin kon kulang para sa purhisyo niini sa mga konsyumante.

Sa pagpatin-aw ni Engr. Closas nga ang ilang linya sa kable sa PLDT anaa sa left side sa highway ug nakalubong sa 10 metros ang gilawmon aron dili makaapekto sa operasyon sa kadalanan.

Ang ilang pagbutang sa linya adunay pagtugot sa Department of Public Works and Highways o DPWH apan subo usab kini gumikan kay ang maong direksyon sa maong linya, gitugutan usab sa DPWH ang Converge Telecommunication nga maglinya sa susamang direksyon. Dugang usab ni Engr. Closas nga dili usab sila makapahunong sa construction sa maong kompanya gumikan kay ang DPWH lamang ang adunay katungod sa pagpahunong niini.




Mihatag usab ug update si Engr. Closas ngadto sa mga membro sa Sangguniang Panlalawigan nga sa kasamtangan, hapit na nila mahuman ang gibutang nga linya gikan sa dakbayan sa Cagayan de Oro paingon sa Talakag lahos sa Pangantucan, Valencia City ug linya sa Lantapan paingon sa Malaybalay City. Ang maong linya posibling magamit na sa sunod nga tuig diin kini gilauman nga makahatag ug dugang linya sa mga konsyumante sa internet ning Probinsya sa Bukidnon.

Facebook Comments