PNP, andam atubangon an kaso ha pagkamatay han 20 anyos nga lalaki ha Tacloban durante han buy-bust

1229

TACLOBAN CITY – Padayon an imbistigasyon han Philippine National Police Regional Drug Enforcement Unit (PNP-RDEU) kun diin nagtitikang an source han droga han 20 anyos nga college student nga napatay han mga otoridad durante han buy-bust operation ha Tacloban City.

Sumala kan PSupt. Harry Sucayre, Chief han PNP-RDEU, ginbibiling nira kun hain o hin-o an source han illegal nga droga ha Cebu City nga gindidistribwer ni Von Fheinry Grandeza ha Tacloban ngan ha kahagrani nga mga bungto.

Subay han report han PNP ngan Philippine Drug Enforcement Agency (PDEA), pinakadamo nga supply han droga ha Eastern Visayas in tikang ha Cebu City.

Dugang ha pamahayag ni Sucayre, antis an buy-bust operation dida han Pebrero 8, ginbuhat na nira an surveillance ha 20 anyos nga suspek matapos maaresto han mga otoridad an usa nga illegal drug user nga nagsumat nga kan Grandeza nakuha an droga.

Hi Grandeza in nagin estudyante han Leyte Normal University ngan anak han usa nga kapitan ha Tacloban.

Siring ni Sucayre, andam hira atubangon an kaso tikang ha pamilya ni Grandeza sanglit waray la anay nira igsumat an mga detalye ha nanabo nga operasyon ha Youngfield, Tacloban.

Arestado gihapon han mga kapulisan an walo pa nga tawo durante han buy-bust operation dida han gab-i han February 8, apil na hi Jose Soledad, tag-iya han panimalay nga gin gamit kumo drug den ngan duha pa nga high value targets — Archie Claridad, 22; ngan Harold Bato, 22, usa nga Seniot High student.

Siring ni Sucayre, an unom nga naaresto in mga senior high school students, apil na dinhi an 17 anyos nga minor de edad nga dayon nga ginrefer ha City Social Welfare and Development Office.

Dugang ha pamahayag ni Sucayre, ginpailarom ha surveillance ha sakob han tulo (3) kabulan an panimalay ni Soledad tungod han mga reports nga nahihimo ini nga drug den.

Ha statement naman ni PNP Regional Director, Chief Supt. Dionardo Carlos, iya ginkadismaya an pagkamatay ni Grandeza tungod han illegal nga droga.

“They should be studying well but unfortunately, fell to this so-called drug trade. I am hoping that we will not encounter another case like this again and I appeal to the parents to please be of guidance to your children for they are the future leaders of this country,”.

Facebook Comments