RMN Laoag — Nagtipon ti pwersa ti PNP Maritime Group iti Philippine Drug Enforcement Agency (PDEA) ti Ilocos Norte ken Ilocos Sur tapno maduktalan ken maikkan solusyon ti problema ti illegal a droga iti pagilian.
Segun iti Maritime Group, agtultuloy ti insidente ti pangibaba kadagiti illegal a droga iti baybay nangnangruna iti paset ti ‘Pacific Ocean’.
Impalgak ni Police Captain Mark Lester Uminiad a tumultulongda iti PDEA babaen ti panagpatrolyada iti baybay a sakop iti probinsia ti Ilocos Norte ken Sur.
Nupay kasta, aminado ti grupoda a limitado ti kagamitanda nangnangruna ti usarenda a Rubber Boat, isu ti gapuna a marigatanda a madanun pay dagiti adayo a paset ti taaw.
Kalkalikaguman met iti grupo a maipaay ti naan-anay a serbisyoda tapno laeng maliklikan wenno maipasardeng ti illegal nga aktibidad a mapaspasamak iti kabaybayan a paset ti pagilian a Pilipinas.
Saan met imbatad ti otoridad nu sadino ti puntirya dagiti kriminal, kas paset iti seguridad iti nadakamat nga impormasyon.
Bernard Ver, RMN News
