Nagpahamtang sang masobra 4,000 ka Police Assistance Desk sa bug-os nga pungsod ang Philippine National Police para sa Semana Santa.
Ini bilang pagpanghanda sa pag-obserbar sang Semana Santa kag pagbantay man sa mga nagabakasyon subong nga summer season.
Bilang kabahin sang security measures, nagpagwa man ang PNP sang pila ka tips para sa seguridad sang publiko sa maabot nga semana santa kag subong nga summer season.
Para sa magabiyahe gamit ang salakyan, siguraduhon nga na-check ang BLOWBAGETS o (Battery, Light, Oil, Water, Brakes, Air, Gas, Engine, Tires and Self).
Sa mga masakay sa mga pampubliko nga salakyan, dapat nga temprano pa magpadulong sa terminal ukon airport kag likawan nga magsuksok sang malahalon nga alahas.
Likawan man nga magpost sa social media kon sa diin kag san-o mabakasyon.
Suno pa sa PNP nga dapat maghalong ang publiko sa pagpaligo sa dagat subong nga summer season bangud base sa ila monitoring, 7 na ang namonitor nila nga nalunod.
