General Santos City–Duna nay ginasundan karon nga person of interest ang Police Station 3 kabahin na sa suspect nga midungab sa usa ka negosyante nga nailang si Rufo Sanchez, 50, nga nanimuyo sa Zone 2, Prk. Masunurin, Townsite, Barangay Buaayan ning syudad sulod mismo sa iyahang panimalay alas 3:50 ang takna sa kabuntagon.
Sumala pa ni Police Lieutenant Felix Minion III, ang Deputy Chief Of Police sa Police Station 3, nga sa karon anaa na sa luwas nga kahimtang ang biktima human nga nakaangkon ug 3 ka samad dinungaban sa iyahang lawas gamit ang wala matinong hait nga hinagiban.
Samtang pagpangawat ang nag-unang motibo nga ginatan-aw karon sa kapulisan kabahin na sa maong pagpanungab kung asa nakamatikod matud pa ang biktima nga adunay kasikas sa ilang sala bandang kaadlawon hinungdan nga iyahang gisuta ug didto naabtan niini ang suspect hinungdan nga gidungab kini sa nahisgutan.
Dugang pa ni Minion nga sa pagsuta sa panimalay sa biktima wala man usab nawala nga mga gamit pasabot nga magsugod palang unta ang suspect apan namatikdan sa biktima.(Dave Silagan)
