Roxas City, Capiz – Ginahibalo sa subong kun sin-o nga grupo ukon indibidwal ang may kahimuan sa pagpaarak sang luthang sa poluy-an sang ginapahayag CEO sang 25-days investment scheme nga nahamtang sa San Jose Ville Barangay Tiza, Roxas City pasado alas 2 sang kaaganhon.
Suno sa mga residente nga nagapuyo malapit sa nasambitan nga lugar, indi magnubo sa pito(7) ka mga lupok sang wala pa matumod nga pusil ang nabatian malapit sa poluy-an ni Junelyn Obamos nga amo naman ang ginakilala bilang si ‘Madam O’.
Pagka-aga, nakit-an ang igu sang bala sa atubang sang gate sang amo nga poluy-an samtang narekober man ang pito(7) tanan ka baseyo sang wala pa matumod nga klase sang pusil.
Mahibaluan nga nangin kontrobersyal ang nasambitan nga si ‘Madam O’ bangud man sa pila ka mga nabaton nga reklamo gikan sa mga investors nga wala makapay-out sang gin-invest nila nga kwarta sa amo nga investment company.
