Pontifical Coronation Anniversary ni La Virgen Milagrosa de Badoc, Naragsak!

iFM Laoag – Napnu’t ragsak ken rag-o dagiti debotantes iti Ilocos Norte ti umuna nga anibersario ti “Pontifical Coronation” ti patron ti probinsia a ni La Virgen Milagrosa de Badoc ita nga aldaw Mayo 31.
Segun ken ni Provincial Tourism Operations Officer Mr. Xavier Ruiz, kas paset ti selebrasyon, naisayangkat ti “fluvial parade” a “highlight” ti maudi nga aldaw ti nobena a pangbigbig iti patron ti probinsia.
Naiparada ti imahen da La Virgen Milagrosa de Badoc ken Sto. Cristo Milagroso de Sinait iti baybay nga adda iti sakop ti ili a Badoc a nangiyulit iti pakasaritaan ti isasangbay ti nasantoan a birhen ditoy probinsia.
Nagkaykaysa dagiti naruay nga umili a nangipakita iti panagdaydayaw da iti nasantoan a birhen bayat ti pannakailibot ti imahen iti baybay.
Inlawlawag ni Ruiz a naisaruno a dagus ti misa nga indauloan ni Metropolitan Archbishop of Nueva Segovia, Most Rev. Marlo M. Peralta, iti Minor Basilica of St. John the Baptist kalpasan ti prusisyon iti baybay.
Innayonna a nakagasgasat ti probinsia gapu ta immadu dagiti “pilgrimage” ken turista a bimmisita iti “minor basilica” ti Badoc.
Mangnamnama ni Ruiz a daytoy ti pangrugian iti pannakagun-ud ti kalikagum ni Gob. Imee Marcos a maipadur-as ti “faith tourism” ditoy probinsia. ### [Ladawan ni Alaric Yanos]
Bernard Ver, RMN News

Facebook Comments