Pre-emptive evacuation sa coastal residents gipatuman

Davao City – Nagpatuman na karon ang Davao City Disaster Risk Reduction Management Council og pre-emptive evacuation sa mga barangay nga anaa sa coastal areas gumikan sa paghampak sa dagko nga balod sukad pa 7:00 kaganinang buntag.

Alayon ani, anaa karon sa mga barangay sa coastal areas sa siyudad si Disaster Risk Reduction Management Council Operation Head Rodrigo Bustillo aron mandoan ang mga opisyales sa pagpatuman og pre-emptive evacuation ngadto sa ilang mga residente.

Gipasabot ni Bustillo nga mas maayo mahikling daan ug mabutang na sa mga evacuation ang mga nagpuyo sa coastal areas aron dili sila madala og kabanlas sa dagko nga balud ug mao kini ang rason ngano karon pa lang gipatuman na ang pre-emptive evacuation.


Gilauman ni Bustillo nga hayan mas mudako pa ang balud nga muhampak sa kabay-bayunan unyang hapon kung hingpit na makasulod sa Philippine Area of Responsibility si Bagyong Ompong.

Dugang pa ni Bustillo, ang dagkong balud karon sa kabaybayunan gumikan kini sa hanging habagat nga mas gipakusog pa ni bagyong ompong karong panahona.

Hinoon, nagpabiling normal ang lakat sa panahon sa tibuok sa siyudad ug wala pa sa’y namonitor ang mao nga buhatan nga misaka na ang level sa kasapaan ug aduna na ba’y mga pagbaha nasinati sa dakbayan gawas lang sa dagkong balod sa kabaybayunan.

RadyoMaN Joel Viray

Facebook Comments