Premature campaigners angay lutoson

10

Davao City – Karon nga natapos na ang Barangay ug Sangguniang Kabataan Elections, ang sunod na usab gipangandaman sa Commission on Election (COMELEC) mao ang umaabot nga 2019 midterm election.

Ug tungod ani, nabantayan ni DILG Undersecretary Martin Diño nga naghinay-hinay na og lihok ang mga politiko pinaagi sa sayo nga pagpalit og boto alang sa ilang kandidatura sa 2019 midterm election sunod tuig.

Gani namonitor ni DILG 11 Director Alex Roldan nga adunay mga dagkung politiko nagpadagan og mga kandidato sa barangay ug SK election isip preparasyon sa ilang kandidatura sa sunod tuig nga piniliay.

Bisan og nakasagap na ang DILG og impormasyon apan ang problema lisod lutoson ang mga politiko tungod walay ni usa mubarog aron magpamatuod nga sila nagbuhi og sapi aron manghagdaw daan og boto agi sa gipangsuportaran nga mga kandidato sa barangay ug sk election.

Wala hinoon giklaro ni Roldan kun pabor ba kini nga ibulgar ang pangalan sa mga kongresista, mga opisyal sa lokal, ug mga opisyales sa barangay nga namalit daan og boto aron makapondo alang sa 2019 midterm election.

Mas maayo matud sa direktor nga i-agi sa korte ang paghukom sa mga politiko nga daw nangampanya na daan bisan og layo pa ang piniliay sa lokal aron sa ingon dili makaingon ang mga giakusahan ni Undersecretary Diño nga sila giguba ug gidaot sa katawhan.

Sa mao nga paagi, mawagtang unya ang mga banat sa mga politiko nga sila wala hatagi og tsansa nga madungog ang ilang bahin labot sa mga akusasyon nga gibuno ngadto kanila.

RadyoMaN Joel Viray

Facebook Comments