Pres. Duterte nagpasalamat sa suportang gihatag sa Davaoeños kaniya

35
Davao City – Personal nga nagpasalamat ni Presidente Rodrigo Duterte sa Davaoeños sa ilang suporta nga nagbutang kaniya nga mahimong presidente sa Pilipinas hangtud nga siya hapit na usab mukanaog sa pwesto.

Sa pamahayag ni Presidente Duterte atol sa Hugpong ng Pagbabago – Hugpong sa Tawong Lungsod (HNP-HTL) miting de avance dinhi sa Davao City kagabii (May0 6, 2022), gihanduraw niini ang iyang pagserbisyo sa taas nga higayon dinhi sa Davao isip Mayor, Bise Mayor, ug Congressman apan wala kini nagdahom nga ang suporta sa katawhan ilabina sa Davaoeños muhatud kaniya sa Malakanyang.

“Di nako matugkad anang unsay inyong gihunahuna pero magpasalamat gyud ko ninyo. Kinsa bay nagtuo nga mudagan ko pagka Presidente? Ug kinsa poy nagtuo’ng mudaog ko? Wala gyud makasabot hangtud karon,” sulti ni Duterte.

Matud ni Duterte, walay siyay personal nga interes sa pagkupot og posisyon kundili ang bugtong tumong lamang mao ang pagserbisyo ug paghigugma sa katawhan.

Samtang, subling giklaro sa presidente nga wala kini i-endorso nga kandidato pagka-presidente alang sa May 9, 2022 Elections.

“Usbon nako ha? Wala koy presidente nga suportahan. Bahala na mo’g kinsa ang inyong gusto. Dili ko mumando ninyo nga mao kini, mao kana, si tarpulano, wala. Neutral ko,” tataw niini.



RadyoMaN Kirby Manzon

Facebook Comments