Presensya sa mga pari sa Oplan Tokhang, mopaneguro nga way mahitabong pagpangabuso ngadto sa mga drug surrenderers suma pa sa Archdiocese of Cebu

Gihangop sa Archdiocese of Cebu ang plano sa Philippine National Police (PNP) nga ilambigit ang religious sector sa mga drug operations sa kapulisan, human nga subli nga gitugot ni presidente Rodrigo Duterte nga makahimo ug anti-illegal drugs operation ang PNP.

Sayo niini, una nang namahayag si PNP Chief Ronald “Bato” dela Rosa, nga plano niyang pakuyugon ang representante sa simbahan sa pagpahigayon og oplan “Tokhang.”

Matod ni Msgr. Joseph Tan, tigpamaba sa Archdiocese of Cebu, nga sila nalipay nga giisip na silang partner sa gobyerno sa illegal drugs campaign, taliwa sa mga nahimong pagsaway sa simbahan gumikan sa pagdaghan sa mga casualty sa drug policies sa Duterte Administration.

Nagkanayon si Tan nga sukad nga gisugdan sa gobyerno ang giyera batok sa ginadiling drugas, ang simbahan dinhi sa Sugbo ang dali usab nga mihimo ug lakang aron sa pag-rehabilitate sa mga drug surrenderers pinaagi sa pagpatuman og live out rehabilitation program isip alternatibo sa mga rehabilitation centers nga mahal og bayad.

Gawas niini, tungod sa kadaghan sa mga drug surrenders, nagtuo si Tan nga dili kapaigo ang mga existing nga rehab centers dinhi sa Sugbo, hinungdan nga ilang giumol ang programa ug gilauman nga sundon usab kini sa ubang parokya nga wala mopatuman niini.

Sa kasamtangan, nagkanayon si Tan nga ilahang gipaabot ang pormal nga imbitasyon sa PNP alang sa maong katuyuan diin ang ilang presensya mopaneguro nga way mahitabong pagpangabuso ngadto sa mga drug surrenders.


Facebook Comments