Wala sa gihapon nalipatan ni Presidente Rodrigo Duterte ang kainit sini kay anay Mayor Jed Patrick Mabilog.
Sa iya pagpamulong-pulong sini nga gab-i sa Camp Peralta Jamindan, Capiz, ginsal-ot ni Pangulong Duterte ang paghinambit kay Mabilog nga ginatudlo sini protector sang illegal nga druga.
Suno kay Duterte nga wala na siya sang plano nga magpalawig pa sa puwesto kag sa tion matapos ang iya termino magapabilin na lamang siya sa sulod sang iya balay.
Ini bangud, ginakabalak-an sini nga ang tanan nga naiguan sang iya kampanya kontra sa illegal nga druga ang magatimalus sa iya kag isa na si anay Mayor Mabilog.
Nagpadulong ang Presidente sa Camp Peralta sa Jamindan, Capiz kag ginpangunahan ang decommissioning sa 727 ka mga anay katapo sang RPA-ABB nga sa karon mga katapo na sang KAPATIRAN.
