Preso balik prisohan

Davao City – Balik prisohan karon ang nakagawas na unta nga 24 anyos nga robbery suspek nga si Michael Silvestre Castillo human subli na usab kining nalambigit sa pagpangawat.

Sa interbyu sa RMN Davao kang Bunawan PNP Station Commander Noel Villahermosa nga mokabat sa P5,000.00 nga mga assorted grocery items ang gidagit sa suspek sa giransak niini nga tindahan sa may Bunawan.

Naaresto si Castillo human nga adunay usa ka menor de edad kinsa positibong gitudlo kini nga nang-apod-apod sa maong kinawat nga mga items ngadto sa iyahang mga higala.


“Kini maong suspetsado notado na pod ni nga kawatan ug positive nga gi-identify usab ang mga narecover nga items sa tag-iya mismo sa tindahan,” segun ni Villahermosa.

Matud ni Villahermosa nga narekober nila ang nahibiling anaa sa duha ka sako sa kinawat nga grocery items bandang alas-10:20 sa buntag kagahapon sa panimalay niini didto sa Purok 1 Petronas Bunawan, Davao City.

Ang suspek nakalaya niadtong Setyembre 2016 human niini maserbisyuhi ang iyahang sentensiya sa kasong robbery sulod sa Davao Penal Colony.

Gipasang-at na ngadto sa piskalya kagahapong adlawa ang kasong robbery batok kang Castillo.

RadyoMaN Aimee Guinita

Facebook Comments