PRIMEWATER HAY MAN SHUTDOWN DIILA OPERASYON ESTE DIA

Ya revela el Zamboanga City Water District (ZCWD) cay prinsipiando este dia hay man shutdown el Primewater Corporation con el diila operasyon na dalida del agua na ciudad porcausa con el problema technical y el limpiesa que hay hace sila na filtration area del rio de Pamucutan donde ya sangga el mga gamput y mga curtoa palo con el entrada del agua para na mensyonao planta de agua na weste.

Na entrevista del RMN Zamboanga con el Assistant General Manager del ZCWD engr. Alejo Rojas, necesita hace coneste el Primewater para hinde queda malo el diila planta amediante el ta experiencia avenida el ciudad.

Presentamente, alto pa asegun el agua na rio de Pamucutan poreso mano-mano el quitada del mga gamput que ta sangga na diila salaan.


Efectivo este dia, hay conduci rasyon de agua el ZCWD con el mga lugar de Pamucutan, Talisayan, Ayala, Recodo, Pitogo, Sinunuc, Maasin, Caragasan, Golf Course, Wesmincom, 28th IB, Suterville, San Jose Gusu, North y Upper Calarian, y Lupong na Cabatangan. Hay utiliza el ZCWD con el servicio del diila mga pumping station na costa weste y mga water tanker para fuede ofrece rasyon de agua con el mga afectao residentes na lugar. – *Bhong Simbajon/RMN News*

Facebook Comments