Private armies angay bungkagon

Davao City – Dangan sa malinawon ug malampuson nga eleksyon karong tuig ang mga private armies sa mga pulitiko kay mao kini ang gamiton aron patyon ang mga kontra nga kandidato ug ang mga botante nga dili mopabor kanila.

Busa gipaboran karon ni Mindanao Advocacy and Social Communication Managing Director Candido Aparece, Jr. ang tingoha ni Pres. Rodrigo Duterte nga mabungkag ang mga private armies sa mga politiko ayha paman hingpit matigayon ang binugnuay sa mga politiko sa eleksyon karong tuig.

Segun ni Aparece, gubot ug samok ang kampanya ug sa adlaw sa eleksyon mismo sa usa ka lugar kung dunay naglihuk nga private army sa pulitiko kansang trabaho mao ang paghulga sa mga magtutudlo nga nagtrabaho og tarong sa eleksyon.


Daghan usab sa mga botante maputos sa kahadlok kay basin initan ug patyon sila sa mga private armies kung dili sila moboto sa ilang mga agalong politiko nga magpapili sa 2019 midterm polls.

Mao nga adunay mga botante mas pilion ang pagpundo sa balay kaysa muadto sa mga polling precincts aron moboto tungod sa kabalaka nga basin madisgrasya pa hinoon ang ilang mga kinabuhi kung mosupak sila sa pahimangno sa mga armado ngadto kanila.

Kung walay mga armado ug mga armas ang mga pulitiko makab-ot gayod ang tunhay ug hapsay nga eleksyon diin ang mga botante dili mahadlok sa pagpakita sa ilang katungod ug gahum sa pagpili og mga kandidato nga sa ilang tan-aw maoy angayan ibutang sa pangatungdanan.

RadyoMaN Joel Viray

Facebook Comments