SAGAY CITY, NEGROS OCCIDENTAL – (UPDATE) Ginmandu na ni PNP Regional Director for Western Visayas, PCSupt. John Bulalacao ang pagpatuman sang preemptive measures batuk sa kalakasan nga ginatuga sang mga rebelding komunista.
Ini kasunod nga ang mga rebelding terorista sa Isla sang Negros amo karon ang ginatudlo nga suspek sa natabo nga mass killing nga nagtuga sang kamatayon sang 9 ka mga mangunguma sa Hacienda Nene, Purok Firetree, Brgy. Bulanon, Sagay City sadtong Sabado, October 20 may mg alas 9:45 sang gab-i.
Ginbuyagyag ni Bulalacao ang ginatawag nga “Oplan Bungkalan at Okupasyon” sang CCP/NPA, isa ka plano nga okupahon ang mga private kag government properties gamit ang ila mass base kag ini ang gina-alegar nga motibo sa likod sang amo nga mass killing.
Angut sini, ginmanduan man ni Bulalacao ang tanan nga field commanders sa rehiyon nga himuon ang tanan agud nga matapna ang kaangay nga hitabo.
Madumduman nga ang mga 9 ka biktima sang amo nga makasiligme nga krimen ang bag-o nga mga recruit sang Negros Federation of Sugar Workers ukon NFSW ukon ang ila pamilya ang miembro.
Nahibaluan nga samtang nagapahuway huway sa ila tulda sa sulod ang hacienda, kapin 5 tubtub 7 ka mga wala makilala nga armado nga mga lalaki ang nagpaarak sang luthang sa ila nga nagresulta sang ila kamatayon./dyHB BACOLOD
