Davao City – Wala gipadaplin sa Police Regional Office 11 ang posibilidad sa spill over dinhi sa rehiyon onse human sa duha ka higayon nga pagpamomba sa lungsod sa Isulan Sultan Kudarat kung asa lima ang patay ug halos 50 ang samdan.
Busa nagpabilin nga alerto ang tibuok puwersa sa kapulisan aron dili mahitabo ang spillover sa pagpamomba sa Isulan sa mga nag-unang lugar sa Region-XI.
Sa miaging semana, gimando ni PRO 11 Director Chief Superintendent Marcelo Morales ang pagpakusog sa intel community sa kapulisan ug pagpalig-on sa seguridad sa tanang lugar sa rehiyon.
Subay ani, miapelar si PRO 11 spokesperson Chief Inspector Milgrace Driz sa publiko nga dili dayon mutoo sa text messages nga nagkatag karon nga muhimo og pagpamomba sa partikular nga lugar sa rehiyon ang teroristang grupo.
Inay ang mas maayo nga buhaton sa publiko matud pa sa opisyal mao ang pagtaho sa kapulisan ugali makadawat og mensahe nga hulga sa terorismo aron ma-imbestigahan dayon ang number nga nag-text.
Una niini, dunay text message nagkatag karon nga nagkanayon nga sunod nga target sa teroristang grupo ang lisonan sa dalan sa Digos City Davao del Sur nga naghatag og kahadlok sa publiko.
Busa aron maulian ang katawhan gikan sa kabalaka, gibutyag ni Driz nga walay lama sa kamatuoran ang mao nga mensahe nga dunay planong mamomba sa naasoy nga siyudad ang teroristang grupo.
RadyoMaN Joel Viray
