Davao City- Nipasalig ang Police Regional Office XI nga itunol ang mga gikinahanglang suporta ug ayuda ngadto sa mga nahibiling pamilya sa upat ka mga pulis nga namatay sa duha ka managlahing disgrasya niadtong Pebrero 23, 2021, adlawng Martes.
Sa interbyu sa RMN Davao kang Police Major Eudisan Gultiano, PRO XI spokesperson, kini maoy prayoridad ug mando ni PRO XI Regional Director PBGen. Filmore Escobal.
“Ang order ni Regional Director (RD) Escobal is to give financial assistance and whatever support doon po sa mga victims at ang pamilya ay masuportaan, mabigyan ng assistance,” sumala niini.
Ang mga biktima giilang sila Pat Kife Hubres Bersaldo sakop sa RFMB 11 kinsa namatay sa motor vehicle collision alas-11:00 sa buntag niadtong February 23, 2021 sa National Highway sa Brgy. Ilaya, Glan, Saranggani Province.
Samtang, nakabsan usab sa kinabuhi ang tulo ka mga pulis nga sila PCpl Aries Jay Eray nga nadestino sa Compostela Municipal Police Station, Patrolman Armon Rudila Pelicano ug Patrolman Adamson De Isidro Casador sakop sa Regional Mobile Force Batallion (RFMB) 11 atol sa disgrasya sa Purok 2, Brgy. Lagab, Compostela, Davao de Oro, February 23, 2021 bandang alas-7:10 sa gabie.
Samdan si PSSg Jayford Sumaliday, ang nagmaneho sa gisakyang Toyota Fortuner sa PNP personnel lakip na ang driver sa nakabangga nilang pula nga Motorstar motorcycle nga si Rodolfo Antiojo samtang patay ang backriders niini nga sila Marlon ug Jason Mabinse.
Sa imbestigasyon, ang gisakyang Toyota Fortuner sa mga pulis nga adunay plate number nga WYI 869 kinsa gimanehoan ni PSSg Sumaliday, gikan kini sa Brgy. San Miguel, Compostela, Davao de Oro padulong og Montevista, Davao de Oro apan nawad-an kini’g control ug ni-swerve sa wala nga direksyon ug nisalpok sa motor nga gisakyan usab sa tulo ka laing mga biktimang sibilyan.
Matud ni Gultiano nga ang mga biktima sa disgrasya nga mga Police Non-Commissioned Officers (PNCOs) kasamtangang ga-undergo og Criminal Investigation Course.
RadyoMAN Aimee Guinita
