Provincial government sang South Cotabato plano nga lakipan na sang utanon ang bugas nga ihatag, PDRRMO Officer in charge ginsiguro nga may bastante nga pondo para sa COVID food assistance.

28

Ginpasiguro ni Provincial Disaster Risk Reduction and Management Officer in charge Rolly Aquino sa mga pumuluyo sang probinsya nga may bastante nga pondo ang provincial government para sa food assistance nga ihatag sa mga pumuluyo dire sa probinsya nga apektado sang enchanced community quarantine kag calibrated lockdown tungod sa paandam sang coronavirus disease ukon COVID-19.
Samtang suno kay Aquino ginaplano sa subong sang provincial government nga sa masunod nga pagpanghatag sang food assistance imbes delata, utanon ang ilakip sa bugas nga ihatag.
Katuyuan sini, suno pa nga mabuligan ang mga mangunguma dire sa probinsya sa subong nga sitwasyon sang panahon.
May-angot sini, ginaawhag ni PDRRM Officer in charge Aquino ang mga pumuluyo nga kon mahimo magtanom man sang utanon sa ugsaran.
Paklaro niya man nga wala sang ginapili sa hatagan sang food assistance ang provincial government tungod tanan ang makabaton imol man ukon manggaranon apang iya ginahingyo sa mga manggaranon nga kon may ikasarang pa sa pagbakal sang pagkaon ang ihatag na lang sa mas nagakinahanglan.
Sa subong suno pa nagapadayon ang ginapatigayon nga repacking sang provincial government para sa ihatag nga food assistance sa mga pumuluyo sang probinsya nga apektado sang enhanced community quarantine.

Facebook Comments