Dipolog City, Zambaonga del Norte – Niikyas nga priso sa kostudiya sa Bureau of Jail Management and Penology (BJMP) Dipolog City Jail, nadakpan na pagbalik ug gipaslak na karon sa prisohan.
Ang nadakpan pugante mao si Marvin Acojedo Matante, 21 anyos, minyo nga taga Prk. Caymito, Barangay Sankol dakbayan sa Dipolog.
Nadakpan si Metante sa mga police personnel sa Dapitan City Police Station sa pagpangulo ni SPO1 Edzel Daquipil uban ang BJMP sa pagpangulo sab ni Jail Warden J/SINSP. Benjamin Cepeda pasado alas 10:20 sa gabii didto sa Purok Balao, Barangay Taguilon dakbayan sa Dapitan.
Si Metante, napriso niadtong Nobembre 24, 2017 sa Dipolog PNP tungod sa duha ka ihap sa kasong theft ug naremand sa City Jail.
Matud pa sa mga Jail Guard nga wala nila hunongi ang pagpangita kang Metante inabagan sa ubang mga law enforcement units sa mga dapit diin kini posibleng nagtago.
Nakaeskapo kini kagahapon sa buntag Decembre 14, 2017 human nisaka ug nilayat sa paril sa likod sa jail dayun dagan sa kasagbuta’ng bahin didto nakalusot sa brgy. San Pedro ug nakasakay sa motorcab paigon sa Brgy. Bagting diin didto kini nanukad sakay sa habal habal paigon sa panimalay sa iyang asawa sa Brgy. Sto. Niño.
Sa dihang nisibat na sab paigon sa iyang kaliwat sa brgy. Taguilon dakbayan sa Dapitan didto na nasigpatan sa mga otoridad ug malampuson nadakpan.
