Davao City – Nadala sa Southern Philippines Medical Center ang usa ka PUJ Driver nga gidunggab sa wala mailhing suspek samtang naghatud kini og pasahero sa Barangay Indangan, Buhangin District 8:40 sa gabii.
Padayon pa giatiman sa medical staff sa SPMC ang biktima nga si Archie Obezo, 27 anyos, PUJ driver ug nagpuyo sa Barangay Cabantian ning siyudad.
Ang biktima nakahiagom og samad dinunggaban sa likod nga bahin.
Gisaysay sa nagdala sa biktima nga adunay pasahero nagpahatud sa Indangan diin pag-abot sa lugar igo ra minaog ang pasahero dihang dunay lalake ang miduol kaniya.
Giingong wala makabantay ang driver sa suspek busa maayo pagkasamad sa likod sa biktima diin human sa hitabo ang mamumuno daw sama sa tagulilon nahanaw niadtong tungora.
Ang kapulisan sa Buhangin nagsusi na sa posibleng motibo ug lakip na pag-ila sa suspek aron dakpon ug ibalhog sa prisohan.
RadyoMaN Joel Viray
