TACLOBAN CITY – Ginpusil-patay ha sakob han iya panimalay an usa nga pulis ha Calachuchi St., Brgy. Muñoz, Catbalogan City, Samar alas 3:00 han kaagahon kanina, Abril 11, 2019.
Subay han report tikang ha Samar Police Provincial Office, ginkilala an pulis nga ginpatay nga hi PSSg. Kirk Walter Lorenzo, naka-assign ha Catbalogan City Police Station.
Nagawas ha inisyal nga imbistigasyon han mga otoridad, umatinder pa an biktima ha alumni event han Samar State University (SSU), Catbalogan City antis manabo an krimen.
Ginsundan han diri pa makilal-an nga suspek an pulis paggawas hini ha SSU.
Pumahuway an pulis ha sofa ha sakob han iya panimalay pero nakasakob ngayan liwat an suspek ngan didto ginpusil ha ulo an biktima.
Nadara pa ini ha hospital pero dead on arrival na ini.
Hi Lorenzo in usa nga admin ha PNP Catbalogan facebook account kun diin updated an mga ginbubuhat han kapulisan ha Catbalogan tungod ha iya.
Ha pagka yana, nagpapadayon an hot pursuit operation han mga otoridad para madakop an suspek.
