PULIS NGA NAKA-PUSIL HUMAN MIRESPONDE, POSIBLENG MAG-ATUBANG UG KASO

General Santos City– Posibleng mag-atubang ug kasong administratibo ang pulis nga Unang nakapusil human nga miresponde, kini bisan pa man nga boluntaryo kining misurender sa kapulisan.
Si Police Staff Sgt. Marvin Cloma nga naka-assign sa Traffic Management Unit unang nahilambigit sa kaso nga pagpamusil sa Purok Intik, Brgy. Mabuhay ning dakbayan.
Sumala kang Police Capt. Brent Salazar, hepe sa Police Station 4 nga nagdumili na nga mupasang-at ug kaso ang duha ka mga biktima nga silang Camilo Libria ug Mary Grace Anda. Apan gibutyag niini nga higayon nga mapamatud-an nga adunay sayop sa kabahin ni Cloma, dili nila kini i-tolerate.
Dugang pamahayag ni Capt. Salazar nga kung dili mupasang-at ug kaso ang mga biktima, magpabiling mag-atubang ug kasong administratibo ang kapulisan batok na kang Cloma.
Subay matud pa sa pamahayag sa pulis, igo lang siyang miresponde sa usa ka gubot kung asa nahilambigit ang igsuon niini ug dinhi natigayon ang init nga panaglalis nga miresulta sa pagpusil ngadto sa mga biktima.
Narekober matud pa sa crime scene ang duha ka empty shell sa 9mm nga pistola kung asa gisubmitar na kini sa crime lab aron masayran kung kini naggikan sa service firearms sa nahisgutang pulis.
Kalabot niini, gibutyag ni Capt. Salazar nga higayon nga mo-desisyon ug pasang-at ug kaso ang mga biktima, mag-atubang ug kasong frustrated homicide pinaagi sa regular filing ang maong pulis. Apan nauna na matud pang nagbutyag ang mga nahisgutan nga dili na sila mupasang-at pa ug kasong kriminal, rason nga sa karon, kasong admisnitratibo ang ilahang ginahikay. (LVR)

Facebook Comments