Nagaduha-duha pa si Punong Barangay Ronel Caso sang Barangay Cagbang, Oton kon magapasaka siya sang reklamo batuk kay SPO3 Norman Espina, ang pulis nga nagbuyayaw sa iya matapos dinalasa sini ang tatlo ka tricycle patrol sang barangay sang nagligad nga gab-i.
Sa interview sang RMN Iloilo, ginpahayag ni Caso nga gina-istoryahan pa nila sang iya pamilya kon padayunon ang pagpasaka sang kaso batuk kay Espina.
Una diri, nagpadulong kaina (Pebrero 21) si Punong barangay Caso sa opisina sang Napolcom kag nagkuha sang pormas para sa pagpasaka sang reklamo.
Suno pa kay Caso nga gin-approach man siya ni Espina kag nagpangayo pasaylo sa natabu kag nagpasalig nga bayaran ang natuga nga damage sa ila tricycle patrol.
Bangud sini , indi pa makapamat-od si Caso kon dayunon ang pagpasaka sang kaso batuk kay SPO3 Espina.
Madumduman nga nakainum si Espina sang matabu ang insidente.
